އިންޑިއާގައި ބާއްވާ އެންމެ ބޮޑު އެއް ޓްރެވަލް ފެއަރކަމުގައިވާ "ވަން ވަރލްޑް ޓްރެވަލް މާޓް"، އޯ.ޓީ.އެމުގައި ރާއްޖެއިން ބައިވެރިވެއްޖެއެވެ.
އެގޮތުން މި ފެއަރގައި މޯލްޑިވްސް މާރކެޓިންގެ އެންޑް ޕަބްލިކް ރިލޭޝަންސް ކޯރޕަރޭޝަން، އެމްއެމްޕީއާރުސީއާއެކު ރާއްޖޭގެ ފަތުރުވެރިކަމުގެ ދާއިރާގައި ހަރަކާތްތެރިވާ ފަނަރަ ފަރާތަކުން ވަނީ ބައިވެރިވެފައެވެ. އަންނަ ބުރާސްފަތި ދުވަހުގެ ނިޔަލަށް އިންޑިއާގެ މުމްބާއީގައި ކުރިއަށްދާ މި ފެއަރގެ ރާއްޖޭގެ ސްޓޭންޑަށް ޒިޔާރަތްކުރާ މީހުންގެ އަދަދު އިތުރުކުރުމަށް ސޯޝަލް މީޑިއާގައި ހަރަކާތްތަކެއް ކުރިއަށްގެންދާ ކަމަށް އެމްއެމްޕީއާރުސީން ބުނެއެވެ.
ފަންސާހަށްވުރެ ގިނަ ޤައުމުން މިއަހަރުގެ ފެއަރގައި ބައިވެރިވެފައިވާ އިރު، ހުސްވި އަހަރުގެ ފެއަރއަށް ތޭރަ ހާހަށް ވުރެގިނަ ފަރާތަކުން ޒިޔާރަތްކޮށްފައިވެއެވެ.
އިންޑިއާއަކީ ރާއްޖެއަށް ފަސްވަނަ އަށް އެންމެ ގިނައިން ފަތުރުވެރިން ޒިޔާރަތްކުރާ ޤައުމެވެ. އަދި ހުސްވި އަހަރު އެޤައުމުން ރާއްޖެއަށް ޒިޔާރަތްކޮށްފައިވާ ފަތުރުވެރިންގެ އަދަދު ވަނީ އޭގެ ކުރީ އަހަރާއި އަޅާ ބަލާއިރު ފަހެއް ޕޮއިންޓު ދޭއް އިންސައްތަ އިތުރުވެފައެވެ.
މި ފެއަރގެ ސަބަބުން އިންޑިއާގައި ރާއްޖެ އިތުރަށް އިޝްތިހާރުވެ، އެޤައުމުން ރާއްޖެއަށް އަންނަ ފަތުރުވެރިންގެ އަދަދު އިތުރުވެގެންދާނެ ކަމަށް އެމްއެމްޕީއާރުސީން ދެކެއެވެ.