ހީވާގި ކަނބަލުންގެ މަޢުރަޒުން ފެނިގެންދިޔަ ތަފާތު ތަކެތީގެ ތެރެއިން ކުޑަކުދިންގެ ސާމާނަކީ ފިހާރަތަކުންވެސް މިފެންނަ ކޮލިޓީގެ ތަކެތިކަން މައުރަޒަށް ޒިޔާރަތްކޮށްލުމުން ފާހަގަވިއެވެ. ތުއްތު ކުދިންގެ ހެދުމާއި ބޫޓާއި، ފައިވާނާއި، ބޭންޑާއި، ހެދުންތަކާއެކު ބޭނުންކުރާ ތަފާތު ބާވަތްތަކާއި ތުއްތު ކުދިންނަށް ޚާއްޞަ ދަބަހާއި، ރަޖާފަދަ ތަކެތި މަޢުރަޒުގައި ބައިވެރިކޮށްފައިވެއެވެ. މިއިން ކޮންމެ އެއްޗަކީ އެހާ ބުރަ މަސައްކަތުން ތައްޔާރުކޮށްފައިވާ ތަކެތިކަން ފާހަގަކުރެވެއެވެ.
މިގޮތުން ވޫލް ބޭނުންކޮށްގެން ހަދާފައި ހުރި، ރަޖާއާއި ހެދުމާއި، ފައިވާނާއި ބޫޓަކީ ވަރަށް ކަވި މަސައްކަތެކެވެ. އެހާމެ ގިނަ ވަގުތުވެސް ހޭދަ ކޮށްފައިވާ މަސައްކަތެކެވެ. އެހެންނަމަވެސް ރާއްޖޭގެ އަންހެނުން މިދައްކައިދެނީ މިއިން ކޮންމެ ކަމަކީވެސް އަންހެނުންނަށް ކެތްތެރިކަމާއެކު ކުރެވޭނެ އެއިން ނަފާވެސް ލިބޭނެ މަސައްކަތެއްކަމެވެ.
ބޭބީ ބޭގްސްއާއި، ބޭބީ ބެޑިންގ ސެޓްފަދަ ތަކެތި މިއީ ޢާންމުކޮށް ފިހާރަތަކުން ލިބެންހުންނަ ތަކެއްޗަށްވާއިރު އެތަކެއްޗެކޭ މި މަޢުރަޒުން ފެންނަ ތަކެއްޗެކޭ އެއްވެސް ތަފާތެއް ނެތެވެ. ބޭރުގެ ކުންފުނިތަކުން އެތަކެތި އުފައްދާ ފެންވަރުގައި ދިވެހި އަންހެނުން މި މަސައްކަތް ކުރަމުން ދާކަން މިއަދު މިދަނީ ފެންނަމުންނެވެ.
ދިވެހި އަންހެނުންގެ މިންނެތް މަސައްކަތްތައް ފެނުމުން، ރާއްޖޭގެ އިޤްތިޞާދަށް ނަފާ އިތުރުކުރެވިދާނެ ދާއިރާތައް މިދަނީ ފެންނަމުންނެވެ.