ރާއްޖެއަށް ފަތުރުވެރިން އަޔަނުދޭން ބައެއް ފަރާތްތަކުން ކުރާ މަސައްކަތް ހުއްޓުވުމަށް ސަރުކާރުން ފެށްޓެވި ޙަރަކާތްތައް ވަރަށް ކާމިޔާބު ކަމަށް ޓޫރިޒަމް މިނިސްޓަރ މޫސާ ޒަމީރު ވިދާޅުވެއްޖެއެވެ.
ބަރލިންގައި މިހާރު ކުރިޔަށްދާ އައިޓީބީ ފެއަރގައި ޕީއެސްއެމަށް ދެއްވި ޚާއްޞަ އިންޓަވިއުއެއްގައި މިނިސްޓަރ ވިދާޅުވީ، ރާއްޖެއަށް ފަތުރުވެރިން އަޔަނުދޭން މަސައްކަތްކުރާ ފަރާތްތަކުގެ ތެރޭގައި އިދިކޮޅު ސިޔާސީ ފަރާތްތަކާއި، ޓްރެވެލް އޭޖެންޓުން ހިމެނޭކަމަށެވެ. ރާއްޖޭގެ ފަތުރުވެރިކަމުގެ ސިނާޢަތު އަމާޒަކަށް ހަދައިގެން ސިޔާސީ ފަރާތްތަކުން ޔޫރަޕްގައި ކުރަމުންދާ މަސައްކަތް ހުއްޓުވުމަކީ ސަރުކާރުން އިސްކަންދެއްވާ ކަމެކެވެ.
މިނިސްޓަރ ވިދާޅުވީ ޖަރުމަންވިލާތަކީ ޔޫރަޕްގެ މާކެޓުގެ ތެރެއިން ރާއްޖެއަށް އެންމެ ގިނަ ފަތުރުވެރިން ޒިޔާރަތް ކުރާ ޤައުމަށްވީއިރު، ރާއްޖެއާއި ދެކޮޅަށް ކުރަމުންދާ އެންޓި ކެމްޕޭން ހުއްޓުވުމަށް ގިނަ މަސައްކަތްތަކެއް ކުރައްވަމުން ގެންދަވާކަމަށެވެ.
އެގޮތުން އައިޓީބީ ފެއަރ ތެރެއިން އެންމެ އިސްކަމެއް ދެއްވަނީ ރާއްޖޭގެ ފަތުުރުވެރިކަމުގެ ދާއިރާގެ ޞައްޙަ މައްލޫމާތާއި، ރާއްޖޭގެ ތަރައްޤީގެ މަޝްރޫއްތަކުގެ ވާހަކަ ހިއްސާކޮށް، ފަތުުރުވެރިން ހިތްޖެއްސޭ ފަދަ މަޢުލޫމާތު ފެތުރުމަށްކަމަށެވެ. އޭގެ ތެރޭގައިަ ފަތުރުވެރިންގެ ސަލާމަތާއި ރައްކާތެރިކަން ކަށަވަރުކުރުންވެސް ހިމެނޭކަމަށް މިނިސްޓަރ ވިދާޅުވިއެވެ.