"އައްޑޫގައި ތަރައްޤީކުރާ ގެސްޓްހައުސްތައް ޖެނުއަރީގައި ހުޅުވޭނެ"

އައްޑޫ ސިޓީގެ ހަ ސަރަޙައްދެއްގައި 67 ގެސްޓް ހައުސް ތަރައްޤީކުރުމަށްވަނީ އިންވެސްޓަރުންނަށް ހުޅުވާލާފައެވެ. އެ ހަ ސަރަޙައްދުތަކަކީ، ހުޅުދޫ ހެރެތެރެ ކައިރި ސަރަޙައްދާއި، މީދޫ ހިކިހެރަ ސަރަޙައްދާއި މަލިމަތި ސަރަޙައްދާއި، ހިތަދޫ ކޮންވެންޝަން ސެންޓަރު ހިމެނޭ ސަރަޙައްދާއި، ފޭދޫ ދިގިހެރައާއި ސަވާހިރިޔާ ހިމެނޭ ސަރަޙައްދުގެ އިތުރަށް މަރަދޫއިން ކަނޑައަޅާފައިވާ ސަރަޙައްދެވެ.

ހަތަރު ފަންގިފިލާއަށް ތަރައްޤީ ކުރާ މިގެސްޓް ހައުސްތަކުގައި 25 ކޮޓަރި ހުރެއެވެ. ތިން ހާހަށްވުރެ ގިނަ ޓޫރިސްޓް އެނދާއިއެކު ތަރައްޤީކުރާ ގެސްޓްހައުސް މަޝްރޫޢު އެއް އަހަރު ދުވަހުގެ ތެރޭގައި ނިންމެވުމަށް ސަރުކާރުންވަނީ އަމާޒުކުރައްވާފައެވެ. މި ގެސްޓްހައުސްތައް އަވަހަށް ނިންމެވުމުގެ މަޤްޞަދުގައި ތަރައްޤީކުރަނީ ބޭރުންގެނެސް ރާވާލެވޭގޮތަށް ނުވަތަ ޕްރީފެބް މޮޑެލަށެވެ.

img:http://s2.psmnews.mv/images/660x400/14782459243128.jpg|ރާއްޖޭގެ ރަށެއްގައި ތަރައްޤީކޮށްފައިވާ ގެސްޓް ހައުސްއެއް / ގެސްޓް ހައުސް ވިޔަފާރި ރާއްޖޭގައި ދަނީ ފުޅާވަމުން

ޓޫރިޒަމް މިނިސްޓަރ މޫސާ ޒަމީރު ވިދާޅުވީ، އައްޑޫ އިންޓެގްރޭޓެޑް ޓޫރިޒަމް މަޝްރޫޢުގެ ދަށުން މިހާރު ކުރިއަށްދަނީ، އިންޖިނިއަރިން އަދި ޕްރޮކިއުމަންޓްގެ މަސައްކަތްތައްކަމަށެވެ. މިނިސްޓަރ ވިދާޅުވީ، މަހެއްހާ ދުވަހުގެ ތެރޭގައި ޢަމަލީ މަސައްކަތް ފަށްޓަވާނެކަމަށާއި، މަސައްކަތް ނިމެމުންދާ މިންވަރަކުން ގެސްޓް ހައުސްތައް ހުޅުވަމުން ގެންދާނެކަމަށެވެ. އެގޮތުން އަންނަ އަހަރުގެ ޖެނުއަރީ މަހުގެތެރޭގައި ބޮޑު ބައެއް ހުޅުވޭނެކަމުގެ ޔަޤީންކަން މިނިސްޓަރ ދެއްވިއެވެ. އަދި މިނިސްޓަރ ވިދާޅުވީ، މި މަޝްރޫޢަކީ ވަރަށް ފުޅަކޮށް ހިންގަވާ މަޝްރޫޢެއްކަމަށާއި، ގެސްޓްހައުސްތަކުގެ އިތުރަށް ގިނަ ޚިދުމަތްތަކެއް ހުންނާނެކަމަށެވެ.

"މީގެއިތުރުން އެ ކުންފުނިތައް މެދުވެރިކޮށް ބޭންކުތަކާއި ފައިނެންޝިއަލް އިންސްޓިޓިއުޓްތަކުން ފަންޑް ހޯދާ މޮޑިއުލްއެއްކަމަށް. 67 ގެސްޓް ހައުސްގެ އިތުރަށް 30 ސްލޮޓް ހިމެނޭނެ. އޭގެ ތެރޭގައި ރެސްޓޯރަންޓް، ސްޕާ، ވޯޓަރ ސްޕޯޓްސް، ވެލްނެސް ސެންޓަރ މިހެންގޮސް ގިނަ ޚިދުމަތްތަކެއް. ކުއްޔަށް ދޫކުރާނީ ފަންސަވީސް އަދި ފަންސާސް އަހަރާއި ދެމެދު. އަދި ޓޫރިޒަމް ޤާނޫނުގެ ދަށުން ކުލި ހިނގާނީ. އެއީ އަކަމީޓަރަކަށް 8 ޑޮލަރު." މިނިސްޓަރ ވިދާޅުވިއެވެ.

މިނިސްޓަރ ޒަމީރު ވިދާޅުވީ، ގެސްޓްހައުސް ތަރައްޤީކުރާ ކުންފުނީގެ ފަރާތުން މާރކެޓްކޮށް ފަތުރުވެރިން ގެނައުމުގެ މަސައްކަތްކުރާނެކަމަށެވެ. މި މަޝްރޫޢުގެ އަމާޒަކީ ގަން އިންޓަރނޭޝަނަލް އެއަރޕޯޓަށް ދާއިމީކޮށް ޝެޑިއުލް ދަތުތައް ބޭއްވުންކަމަށާއި، ކުރިން ރާއްޖޭގައި އޮތްކަހަލަ ޗާޓާ މާރކެޓް ފުޅާކުރެއްވުންކަމަށް ވެސް މިނިސްޓަރ ވިދާޅުވިއެވެ.

img:http://s4.psmnews.mv/images/660x400/14870849179021.jpg|އައްޑު ސިޓީގެ މަގެއް / އައްޑޫ ސިޓީގެ ހަ ސަރަޙައްދެއްގައި 67 ގެސްޓް ހައުސް ތަރައްޤީކުރުމަށްވަނީ އިންވެސްޓަރުންނަށް ހުޅުވާލާފައި

"މިހާރު އެއޮތީ ގަން އެއަރޕޯޓް ތަރައްޤީކޮށްފައި. ބޭނުމަކީ މި މަޝްރޫޢާއެކު ދައިމީ ޝެޑިއުލް ދަތުރުތައް ފެށުން. އަދި ކުރިން އޮތް ނަމަވެސް މިހާރު ގެއްލިފައިވާ ޗާޓާ މާރކެޓް ފުޅާކުރުން. ސަތޭކަ ނުވަތަ ދުއިސައްތަ ޑޮލަރާ ދެމެދު އޮތް ޗާޓާ މާކެޓު އިޓަލީ ފަދަ ގައުމުތަކުން. މިހާރު ޖެމެއިކާ ނޫނީ ބަހާމާސް ފަދަ ތަންތަނުގައި އެ މާކެޓް އޮތީ. އެ މާކެޓަށް ޓެޕް ކުރުން މައިގަނޑު ބޭނުމަކީ،" މިނިސްޓަރ ވިދާޅުވިއެވެ.

މި މަޝްރޫޢު ކުރިއަށް ގެންދަވާ މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްއައިޓީޑީސީގެ މެނޭޖިންގ ޑިރެކްޓަރ މުޙައްމަދު ޝާހިދު ވިދާޅުވީ، މިއަހަރުގެ ތެރޭގައިވެސް ހުޅުވެންހުރި ގެސްޓް ހައުސްތައް ހުޅުވައި ޚިދުމަތްދޭން ފަށްޓަވާނެކަމަށެވެ.

އައްޑޫ އިންޓެގްރޭޓެޑް ގެސްޓްހައުސް މަޝްރޫއަށް ގަތްގަނޑަކަށް ވިހި ނުވަތަ ފަންސަވީސް މިލިއަން ޑޮލަރު ޚަރަދުވާނެކަމަށް އެމްއައިޓީޑީސީން ލަފާކުރެއެވެ. ގެސްޓް ހައުސްތައް ތަރައްޤީކޮށް ހިންގުމުގައި އިސްކަންދެއްވާނީ އައްޑޫގެ އިންވެސްޓަރުންނަށްކަމަށް ޓޫރިޒަމް މިނިސްޓްރީން ވިދާޅުވެއެވެ.