އިޓަލީގެ ޤައުމީ އެއަރލައިން "އަލިޓާލިއާ"ގެ ޝެޑިއުލް ދަތުރުތައް ވެލާނާ އިންޓަނޭޝަނަލް އެއަރޕޯޓަށް ފަށައިފިއެވެ.
އަލިޓާލިއާގެ ޝެޑިއުލް ފުރަތަމަ ފުލައިޓް ވެލާނާ އިންޓަނޭޝަނަލް އެއަރޕޯޓްގައި މިއަދު ވަނީ ޖައްސާފައިވާއިރު މީގެ ކުރިން އެލިޓާލިއާއިން ރާއްޖެއަށް ކުރަމުން އައިސްފައިވަނީ ޗާޓާރ ދަތުރުތަކެކެވެ. ނަމަވެސް އަލިޓާލިއާއިން ޝެޑިއުލް ދަތުރުތައް ރާއްޖެއަށް ފަށާފައިވާއިރު މިދަތުރުތައް ކުރާނީ އިޓަލީގެ ރޯމުން ރާއްޖޭގެ ވެލާނާ އިންޓަރނޭޝަނަލް އެއަރޕޯޓަށެވެ. މި ދަތުރުތަކާއި ބެހޭގޮތުން ވާހަކަދައްކަވަމުން މޯލްޑިވްސް އެއަރޕޯޓްސް ކޮންޕެނީ ލިމިޑެޓްގެ އެސޯސިއޭޓް ޖެނެރަލް މެނޭޖަރ ކޯޕަރޭޓް ކޮމިއުނިކޭޝަން ހަސަން އަރީފް ވިދާޅުވީ އަލިޓާލިއާއިން ހަފްތާއަކު ތިން ދުވަހު ރާއްޖެއަށް ދަތުރުތައް ބާއްވާނެކަމަށެވެ.
img:http://s1.psmnews.mv/images/660x400/15095292563307.jpg|އަލިޓާލިއާގެ ފުރަތަަމަ ޝެޑިއުލް ފްލައިޓް ވެލާނާ އިންޓަނޭޝަނަލް އެއަރޕޯޓުގައި / ފޮޓޯ؛ ޕީއެސްއެމް ނިއުސް
މި ދަތުރުތަކުގައި އެ އެއަރލައިނުން ބޭނުންކުރާނީ އޭ 330 ގެ ބޯޓެއްކަމަށާއި މިއީ 250 މީހުންގެ ޖާގައިގެ ބޯޓެއްކަމަށް އަރީފް ވިދާޅުވިއެވެ. އަލިޓާލިއާއިން ކޮންމެ ހަފްތާއެއްގެ ހޮނިހިރު، އާދިއްތަ އަދި ބުދަ ދުވަހު ޝެޑިއުލް ދަތުރުތައް ރާއްޖެއަށް ކުރާނެއެވެ. ވޮޔޭޖަސް މޯލްޑިވްސް މެދުވެރިކޮށް އަލިޓާލިޔާއިން ދަތުރުތައް ކުރަން ބޭނުންވާ ފަރާތްތަކަށް ޓިކެޓް ގަނެވޭނެކަމަށް ވޮޔޭޖަސް މޯލްޑިވްސްއިން މައުލޫމާތުދެއެވެ. އިޓަލީގެ ރޯމުން ވެލާނާ އިންޓަނޭޝަނަލް އެއަރޕޯޓަށްކުރާ މި ދަތުރުތަކުގެ ދިގުމިނަކީ 9 ގަޑިއިރާއި 30 މިނެޓެވެ.
އަލިޓާލިޔާއިން އެ އެއަރލައިންގެ ދަތުރުތައް ރާއްޖެއަށް ފުރަތަމަ ފަށާފައިވަނީ 1985 ވަނަ އަހަރުގެ ތެރޭގައެވެ. އޭގެފަހުން އަހަރުތަކެއް މެދުކެނޑުމަކަށްފަހު 2014 ވަނަ އަހަރުވެސް އެ އެއަރލައިނުން ވަނީ ރާއްޖެއަށް ހައި ޝީޒަނާއި ދިމާކޮށް ޗާޓަރ ދަތުރުތައް ފަށާފައެވެ. އިޓަލީއަކީ ރާއްޖޭގެ ފަތުރުވެރިކަމުގައި މުހިންމު މާކެޓަކަށްވީއިރު މިފެށި ޝެޑިއުލް ދަތުރުތަކުގެ ސަބަބުން ރާއްޖޭގެ ފަތުރުވެރިކަމަށް ގިނަގުނަ ފައިދާތަކެއް ލިބިގެންދާނެއެވެ.