އުފަންދުވަސް ފާހަގަކުރުމަށް ރާއްޖެއައި އިނގިރޭސިވިލާތުގެ ރައްޔިތެއްކަމަށްވާ، ޖޯޖިނާ ހޮލްބްރޫކަށް، ރާއްޖޭގެ މައި ދޮރާށިން އެތެރެވުމާއެކު ބޮޑު ސަޕްރައިޒެއް ލިބިއްޖެއެވެ.
ޖޯޖިނާ ހޮލްބްރޫކު ވެގެންގޮސްފައި މިވަނީ މިއަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާއަށެވެ. މި ތާރީޚީ ލަޤަބާއެކު ވެލާނާ އިންޓަރނޭޝަނަލް އެއަރޕޯޓުން އޭނާއަށް ވަނީ ހޫނު މަރުޙަބާއެއް ކިޔާފައެވެ.
އެމްއެމްޕީއާރުސީން އިސްނަގައިގެން ކޮންމެ އަހަރަކުވެސް ރާއްޖެއަށް ޒިޔާރަތްކުރާ ފުރަތަމަ ފަތުރުވެރިޔާއަށް އަންނަނީ ހޫނު މަރުހަބާއެއް ކިޔަމުންނެވެ.
މިއަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާގެ ލަޤަބު ހޯދި އިނގިރޭސިވިލާތަށް އުފަން އުމުރުން 17 އަހަރުގެ ޖޯޖިނާ ހޮލްބްރޫކް ރާއްޖެ އައިސްފައިވަނީ ހެނދުނު 7 ޖެހިއިރު ވެލާނާ އިންޓަނޭޝަނަލް އެއަރޕޯޓްގައި ޖެއްސި ފުލައި ދުބާއީގެ ފުލައިޓަކުންނެވެ. ޖޯޖިނާ ރާއްޖެ އައީ އޭނާގެ މަންމަ އާއި ބައްޕައާއެކު އޭނާގެ 18 ވަނަ އުފަންދުވަސް ފާހަގަކުރުމަށްށެވެ.
އެމްއެމްޕީއާރުސީއާއި އެމްއޭސީއެލް އާއި މިދާއިރާގައި ޙަރަކާތްތެރިވާ ބައެއް ކުންފުނިތަކުގެ އިސްވެރިންވަނީ ވެލާނާ އިންޓަނޭޝަނަލް އެއަރޕޯޓުން ޖޯޖިނާ އަށް ހޫނު މަރުހަބާއެއްކިޔާފައެވެ. އަދި ފުރަތަމަ ފަތުރުވެރިޔާކަން އަންގައިދޭ ހަދާނީ ލިޔުމަކާއި ޚާއްސަ ހަދިޔާއެއްވެސް އޭނާއަށް ވަނީ ދީފައެވެ. މީގެ އިތުރުން އޭނާއަށް ހުރަވަޅި އައިލެންޑް ރިސޯޓް އެންޑް ސްޕާއިން ވަނީ 7 ދުވަހު ހުރުމުގެ ފުރުސަތުވެސް ހިލޭ ދީފައެވެ.
ވެލާނާ އިންޓަނޭޝަނަލް އެއަރޕޯޓްގައި ހުރެ މީޑިއާއާއި ވާހަކަދައްކަމުން ޖޯޖިނާ ބުނީ މިއަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާގެ ލަޤަބް އޭނާއަށް ލިބުމުން ވަރަށް އުފާވާކަމަށެވެ. އަދި ރާއްޖެއަކީ އޭނާ އެންމެ ގަޔާވާ މަންޒިލްކަމަށާއި މިއީ އޭނާ ރާއްޖެ ޒިޔާރަތްކުރި 6 ވަނަ ފަހަރުކަމަށެވެ.
ޖޯޖިނާ އެންމެ ފުރަތަމަ ރާއްޖެ އައިސްފައިވަނީ މީގެ 10 އަހަރު ކުރިން އޭނާގެ އުމުރުން 7 އަހަރުގައެވެ. މިމަހުގެ 3 ވަނަ ދުވަހު 18 އަހަރުފުރޭ ޖޯޖިނާ އޭނާގެ އުފަންދުވަހު ކުރާނީ ކޮންކަމެއްތޯ ސުވާލުކޮށްލުމުންބުނީ އޭނާގެ އުފަންދުވަހުދާނީ ވޭލްޝާކާއެކު ފީނުމަށްކަމަށެވެ. އޭނާ އެންމެ ފުރަތަމަ ފީނަން ދަސްކުރީވެސް ރާއްޖެއިންކަމަށް ޖޯޖިނާ ބުންޏެވެ.
img:http://s4.psmnews.mv/images/660x400/15147944889491.jpg|
ޖޯޖިނާގެ ބައްޕައާއި މަންމަ ހުރީ މިއަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާގެ ލަޤަބް އެމީހުންގެ ދަރިފުޅަށް ލިބުމުން ވަރަށް އުފާވެފައެވެ. ޕީއެސްއެމް ނިއުސްއަށް މަޢުލޫމާތުދެމުން ޖޯޖިނާގެ ބައްޕަ ބުނީ އޭނާގެ ދަރިފުޅުގެ 18 ވަނަ އުފަންދުވަސް ފާހަގަކުރުމަށް ރާއްޖެއައިއިރު މިފަދަ ހޫނު މަރުޙަބާއަކަށް އެއްވެސް ވަރަކަށް އުންމީދު ނުކުރާކަމަށެވެ. ނަމަވެސް ރާއްޖެއަކީ އަބަދުވެސް އެމީހުން އަންނަން ބޭނުންވާތަނެއްކަމަށެވެ.
މިއަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާއަށް މަރުހަބާކިޔުމަށް ބޭއްވި ޙާއްސަ ހަރަކާތާ ބެހޭގޮތުން މަޢުލޫމާތުދެއްވަމުން މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ) ގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދު ވިދާޅުވީ މި ޙަރަކާތުގެ ބޭނުމަކީ 2018 ވަނަ އަހަރުގެ ޕްރޮމޯޝަނަލް އަދި މާކެޓިންގެ ޙަރަކާތްތައް ކުލަގަދަކޮށް ކުރިއަށްގެންދިއުމާއި އަދި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ގުނަން ފެށުންކަމަށެވެ. މިއަހަރު ރާއްޖެއަށް ޒިޔާރަތްކުރި ފުރަތަމަ ފަތުރުވެރިޔާ ޖޯޖިނާ ހޮލްބްރޫކާއި އޭނާގެ އާއިލާއިން ރާއްޖޭގެ ފަތުރުވެރިކަން ޕްރޮމޯޓްކޮށްދިނުމަށް އެހީތެރިވެދޭނެކަން ހާމަކޮށްފައިވާކަމަށްވެސް ހާރިސް ވިދާޅުވިއެވެ.
"އެމީހުން އެއްބަސްވޭއެބަ މިއަހަރުގެ ތެރޭގައި ދިވެހިރާއްޖެ ޕްރޮމޯޓްކޮށް ސޯޝަލް މީޑިއާ އޮންލައިން މާކެޓިންގައި ދިވެހިރާއްޖޭގެ ޓޫރިޒަމް ޕްރޮމޯޝަން ބޯޑުން ކުރަމުން މިގެންދާ މަސައްކަތްތަކަށް އެމީހުންގެ އެހީތެރިކަން ފޯރުކޮށްދޭން"
ޖޯޖިނާ ހޮލްބްރޫކާއި އޭނާގެ އާއިލާ ތިބުމަށް ހަމަޖެހިފައިވަނީ ކޮންރަޑް މޯލްޑިވްސް ރަނގަލި އައިލެންޑް ރިސޯޓްގައެވެ.