މިމަހުގެ ތެރޭގައި ދުނިޔޭގެ ފަސް ފެއަރއެއަގައި ބައިވެރިވާން މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ)އިން ނިންމައިފިއެވެ.
އޭގެތެރޭގައި ހިމެނެނީ ސްޕެއިންގެ މެޑްރިޑްގައި އޮންނަ ފިތޫރު ފެއަރއާއި ޖާރމަނީގެ ޑެސެލްޑޯފް ގައި އޮންނަ ބޫޓް ފެއަރއާއި، ސްވިޒަލެންޑްގެ ޒިއުރިޗް ގައި ބާއްވާ ފެސްޕޯ ފެއަރ އާއި އިންޑިއާގެ މުންބާއީގައި އޮންނަ އޯޓީއެމް ފެއަރގެ އިތުރުން ތުރުކީގެ އިސްތަންބޫލްގައި އޮންނަ އީއެމްއައިޓީޓީ ފެއަރއެވެ.
މިފެއަރތަކާ ގުޅޭ މަޢުލޫމާތު ފަތުރުވެރިކަމުގެ ދާއިރާގައި ޙަރަކާތްތެރިވާ ފަރާތްތަކާ ޙިއްސާކުރުމަށް މިއަދުވަނީ ބައްދަލުވުމެއް ބާއްވާފައެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަންގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދު ވިދާޅުވީ، މި ހަރަކާތުގެ ބޭނުމަކީ މިމަހުގެ ތެރޭގައި ބޭއްވުމަށް ހަމަޖެހިފައިވާ ބައިނަލްއަޤްވާމީ ފެއަރތަކާ ބެހޭގޮތުން ބައިވެރިންނަށް މައުލޫމާތު ދިނުންކަމަށެވެ. މީގެ ސަބަބުން ފެއަރތަކަށް ދިއުމުގެ ކުރިން ބައިވެރިންނަށް ފެއަރއާބެހޭ މަޢުލޫމާތުލިބި ތައްޔާރީތައްވުމަށް ފަސޭހަވާނެކަމަށް ހާރިސް ވިދާޅުވިއެވެ.
"މިއަހަރު ކުރަން ހަމަޖެހިފައިވާ ކެންޕެއިންތަކުގެ ތެރެއިން ބޭއްވޭ މުހިންމު 5 އިވެންޓެއްގެ މަޢުލޫމާތު ޕާޓިސިޕެންޓުންނާ ޙިއްސާކުރުމަށް ބޭއްވި އިވެންޓެއް. އެހެން އަހަރުތަކެކޭވެސް އެއްފަދައިން ބައިވެރިވާ ހުރިހާ ކޯއެގްޒެބިޓަރުންނާއިއެކު އަޅުގަނޑުމެން ފުރުމުގެ ކުރިން އިވެންޓަކާއިބެހޭ ޙާއްސަ މައުލޫމާތު ހިއްސާކުރަން." ޙާރިސް ވިދާޅުވިއެވެ.
މި ހުރިހާ ފެއަރއެއްވެސް އޮންނާނީ މިމަހުގެ ފަހުކޮޅުއެވެ. ރާއްޖޭގެ ފަތުރުވެރިކަން އިޝްތިހާރުކުރުމަށް އެމްއެމްޕީއާރުސީން އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން މިއަހަރުގެ ތެރޭގައި ބައިނަލްއަޤްވާމީ 15 ފެއަރއެއްގައި ބައިވެރިވާނެކަމަށް އެމްއެމްޕީއާރުސީން ބުނެއެވެ.