މަޝްހޫރު ޓްރެވަލް މަޖައްލާއެއް ކަމަށްވާ ކޮންޑެނާސްޓް ޓްރެވަލަރސްގެ މިއަަހަރުގެ ގޯލްޑް ލިސްޓްގައި ރާއްޖޭގެ ރިސޯޓެއް ކަމަށްވާ ސޮނެވާފުށި ހިމެނިއްޖެއެވެ.
އެ މަޖައްލާއިން ބުނެފައިވަނީ ސޮނެވާފުއްޓަކީ ހުރިހާ ފަންތިއެއްގެ މީހުނަށްވެސް ކަމުދާނެފަދަ ރިސޯޓެއްކަމަށެވެ. ރިސޯޓުން ލިބެންހުރި ޚިދުމަތްތަކުގެ ފެންވަރު ރަނގަޅުކަން އެ މަޖައްލާއިން ވަނީ ފާހަގަކޮށްފައެވެ.
ކޮންމެ އަހަރަކު ކޮންޑެނާސްޓް އިން ނެރޭ ގޯލްޑް ލިސްޓަކީ ދުނިޔޭގެ އެންމެ ރަނގަޅު ހޮޓެލްތައް ހިމަނައިގެން ނެރޭ ލިސްޓެކެވެ.
ކޮންޑެނާސްޓް ޓްރެވަލަރސްގެ މިއަހަރުގެ ގޯލްޑް ލިސްޓްގައި ހިމެނުމުގެ ކުރިން މިދިޔަ އަހަރު ސޮނެވާފުށި ވަނީ އެ މަޖައްލާއިން ހޮވާ ރީޑާރސް ޗޮއިސް އެވޯޑްގެ އެންމެ ރަނގަޅު ރިސޯޓްގެ މަޤާމާއި، 2017 ވަނަ އަހަރު އޭޝިޔާ ޕެސިފިކް ސަރަހައްދުގެ ގްރީން ހޮޓެލިއަރ އެވޯޑްވެސް ހޯދާފައެވެ.
ސޮނެވާ ފުއްޓަކީ 1995 ވަނަ އަހަރުން ފެށިގެން ޙިދުމަތްދެމުންއަންނަ ރިސޯޓެކެވެ. މި ރިސޯޓް އޮންނަނީ ބ އަތޮޅު ޔުނެސްކޯ ބައޮސްފިއަރ ރިސަރވް ސަރަހައްދުގައެވެ.