ޑައިވް ކުރުމާއި މޫދު ކުޅިވަރަށް ޚާއްޞަ ކޮށްގެން ދުނިޔޭގައި ބާއްވާ އެންމެ ބޮޑު ހަރަކާތްކަމަށްވާ ބޫޓު ފެއަރގަ ރާއްޖެއިން ބައިވެރިވެއްޖެއެވެ. "ބޫޓް ފެއަރ" ކުރިއަށްދާނީ މިމަހުގެ 20 އިން 28 ހަށް ޖަރުމަނުވިލާތުގެ ޑަސަލްޑޯފްގައެވެ.
ޑައިވް ކުރުމާއި މޫދު ކުޅިވަރަށް ޚާއްޞަ ކޮށްގެން ދުނިޔޭގައި ބާއްވާ އެންމެ ބޮޑު ހަރަކާތް ކަމަށްވާ ބޫޓު ފެއަރގަ ރާއްޖޭގެ ފަރާތުން މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން (އެމްއެމްޕީއާރުސީ)އާއިއެކު ފަތުރުވެރިކަމުގެ ދާއިރާގައި ހަރަކާތްތެރިވާ 7 ކުންފުންޏަކުން 15 ފަރާތެއް ބައިވެރިވެއެވެ. މި ފެއަރ ކުރިއަށްދާނީ މިމަހުގެ 20 އިން 28 ހަށް ޖަރުމަނުވިލާތުގެ ޑަސަލްޑޯފްގައެވެ. މި ފެއަރގައި ރާއްޖޭގެ ފަރާތުން އިސްކޮށް ހަރަކާތްތެރިވަނީ އެމްއެމްޕީއާރުސީގެ އެކްޓިންގ މެނޭޖިންގ ޑިރެކްޓަރ ހާރިސް މުޙައްމަދާއި ރާއްޖެއިން ޖަރުމަންވިލާތަށް ކަނޑައަޅުއްވާފައި ހުންނަވާ ސަފީރު ޖަމީލާ ޢަލީ ޚާލިދެވެ.
މިއަހަރުގެ ބޫޓް ފެއަރގައި ރާއްޖެއިން ޕްރޮމޯޓް ކުރާނީ ރާއްޖޭގެ ކަނޑުއަޑީގެ ރީތިކަންކަމަށް އެމްއެމްޕީއާރުސީން ބުނެއެވެ. މިއަހަރުގެ ފެއަރގައި 60 ޤައުމަކުން 1،800 ފަރާތަކުން ބައިވެރިވެއެވެ.
ޑައިވިންގް އާއި މޫދު ކުޅިވަރަށް ޝައުޤުވެރިކަން ހުންނަ ފަރާތްތަކަށް އަމާޒުކޮށްގެން ބާއްވާ މިފެއަރއަށް މިދިޔަ އަހަރު ދުއިސައްތަ ހާހަށްވުރެ ގިނަ މީހުންޒިޔާރަތް ކުރިއެވެ. އެމްއެމްޕީއާރުސީން ހާމަކުރާގޮތުގައި މި ފެއަރ މެދުވެރިކޮށް، ރާއްޖޭގެ ކަނޑުއަޑީގެ ރީތިކަން އިތުރަށް އިޝްތިހާރުކޮށް، ރާއްޖެއަށް އަންނަ ފަތުރުވެރިން އިތުރުކުރުމަށް މަސައްކަތް ކުރާނެއެވެ.
އެމްއެމްޕީއާރުސީން މިމަހުގެ ތެރޭގައި ރާއްޖެ އިޝްތިހާރުކުރުމަށް ބައިނަލްއަޤްވާމީ 2 ފެއަރއެއްގައި މިހާރުވެސް ވަނީ ބައިވެރިވެފައެވެ. އެއީ މިމަހުގެ 17 އިން 21 އަށް ސްޕެއިންގެ މެޑްރިޑްގައި ބޭއްވި ފިތޫރު ފެއަރއާއި 18 އިން 20 އަށް އިންޑިއާގެ މުންބާއީގައި ކުރިއަށްދިޔަ އޯޓީއެމް ފެއަރއެވެ.