މޯލްޑިވްސް އެސޯސިއޭޝަން އޮފް ޓްރެވެލް އެޖެންޓް އެންޑް ޓުއަރ އޮޕަރޭޓާރސް (މަޓާޓޯ) އިން މިމަހުގެ ތެރޭގައި މެދު އިރުމަތީގެ ޤައުމުތަކުގައި މުޅިން އަލަށް ރާއްޖެ އިސްތިހާރުކުރާނެކަމަށް އެ އެސޯސިއޭޝަނުން ބުނެފިއެވެ.
ރާއްޖޭގެ ފަތުރުވެރިކަން އިސްތިހާރުކުރުމަށް މަޓާޓޯއިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން އެ އެސޯސިއޭޝަނުން މެދުއިރުމަތީގެ 4 ޤައުމެއްގައި ރާއްޖެ އިސްތިހާރުކުރުމަށް ރޯޑް ޝޯތައް ބޭއްވުމަށް ވަނީ ތައްޔާރުވެފައެވެ.
ޕީއެސްއެމް ނިއުސްއަށް މަޢުލޫމާތުދެއްވަމުން މަޓާޓޯގެ ޑެޕިއުޓީ ސެކްރެޓަރީ ޖެނަރަލް އަސްރާ ނަސީމް ވިދާޅުވީ މި ރޯޑްޝޯތައް ފަށާނީ ދުބާއީންކަމަށެވެ. އޭގެ ފަހުން ކުވައިތާއި، ގަޠަރާއި އޮމާންގައިވެސް މި ރޯޑްޝޯތައް ބޭއްވުމަށް ނިންމާފައިވާކަމަށް އަސްރާ ވިދާޅުވިއެވެ.
މިމަހުގެ 11 އިން 15 އަށް މަޓާޓޯއިން ބާއްވާ މި ރޯޑްޝޯތަކުގައި އެ އެސޯސިއޭޝަނާއެކު ރާއްޖޭގެ ފަތުރުވެރިކަމުގައި ޙަރަކާތްތެރިވާ 13 ކުންފުންޏަކުން ބައިވެރިވެއެވެ.
މި ރޯޑްޝޯތަކުގައި ބީޓުބީ އިވެންޓްތަކާއި، ވޯކްޝޮޕްތައް ކުރިއަށްދާނެކަމަށް މަޓާޓޯއިން މަޢުލޫމާތުދެއެވެ. މި ހަރަކަތުގެ ތެރެއިން މެދުއިރުމަތީގެ ފަތުރުވެރިކަމުގައި ހަރަކާތްތެރިވާ ކުންފުނިތަކަށް ރާއްޖޭގައި ހުރި ފުރުސަތުތަކާއި ގުޅޭގޮތުން މައުލޫތު ހިއްސާކުރެވޭނެއެވެ. މިއީ މިއަހަރުގެ ތެރޭގައި މަޓާޓޯއިން ބާއްވާ ފުރަތަމަ ރޯޑްޝޯއެވެ.
މެދުއިރުމަތީގެ ޤައުމުތަކުން ރާއްޖެއަށް ޒިޔާރަތްކުރާ ފަތުރުވެރިންގެ ޢަދަދު އަހަރަކުން އަހަރެއް އަންނަނީ އިތުރުވަމުންނެވެ. 2017 ވަނަ އަހަރުގެ ތެރޭގައި އެ ސަރަހައްދުގެ ޤައުމުތަކުން ރާއްޖެއަށް ޒިޔާރަތްކުރި ފަތުރުވެރިންގެ ޢަދަދު ފަންސާސް އެއްހާހަށްވުރެ އިތުރެވެ.
މިހާރު ކުރިއަށްދާ ތައި އިންޓަނޭޝަނަލް ޓްރެވެލް ފެއަރ ގައިވެސް މަޓާޓޯއިން ބައިވެރިވެ ރާއްޖޭގެ ފަތުރުވެރިކަން އަންނަނީ އިޝްތިހާރުކުރަމުންނެވެ.