ހައިރައިޒްއާއި، މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯ) ގުޅިގެން ރާއްޖޭގެ އިޤްތިސާދުގެ އެކި ދާއިރާތައް އިޝްތިހާރުކުރުމަށް ފަށާފައިވާ ބައިނަލްއަޤްވާމީ އިވެންޓް "މޯލްޑިވްސް ޝޯކޭސް"ގެ ފުރަތަމަ ފެއަރ މިމަހުގެ ތެރޭގައި ބާއްވާނެކަން ހާމަކޮށްފިއެވެ.
ރާއްޖޭގެ އިވެންޓްސް މެނޭޖްމެންޓް ކުންފުނި ހައިރައިޒުން ބުނީ "މޯލްޑިވްސް ޝޯކޭސް" ގެ ފުރަތަމަ އެޑިޝަން މިއަހަރުގެ ޖުލައި މަހުގެ 26 އިން 27 އަށް ކޮލަންބޯގެ ތާޖް ސަމުދްރާގައި ކުރިއަށްދާނެކަމަށެވެ. މި އިވެންޓްގައި އިޝްތިހާރުކުރާނީ ރާއްޖޭގެ ފަތުރުވެރިކަމާއި، ވިޔަފާރިތަކާއި، ހުނަރުތައް އަދި ދިވެހި ރަހަތައްކަމަށް ހައިރައިޒުން މައުލޫމާތުދެއެވެ.
މި ފެއަރގައި ބައިވެރިވާން ބޭނުންވާ ފަރާތްތަކަށް ހައިރައިޒުން މިހާރު ވަނީ އެ ފުރުޞަތު ހުޅުވާލާފައެވެ. އަދި ފެއަރގެ ސްޕޮންސަރަކާއި، 2 ކޯ ސްޕޮންސަރުން ހޯދުމަށްވެސް ވަނީ ހުޅުވާލާފައެވެ.
މި ފެއަރގައި ބައިވެރިވުމަށް މިހާރުވެސް ބައެއް ފަރާތްތައް ޝައުޤުވެރިކަން ފާޅުކުރަމުން އަންނަކަމަށް ހައިރައިޒުން ބުނެއެވެ.
"މޯލްޑިވްސް ޝޯކޭސް" އަކީ ހައިރައިޒް އަދި މަޓާޓޯ ގުޅިގެން 2017 ވަނަ އަހަރުގެ ތެރޭގައި ރާއްޖެ އިޝްތިހާރުކުރުމަށް ލޯންޗްކޮށްފައިވާ ޙަރަކާތެކެވެ.