މަޓާޓޯއިން ކޮންމެ އަހަރަކު ބާއްވަމުން އަންނަ މޯލްޑިވްސް ޓްރެވެލް އެވޯޑްސްގެ މިއަހަރުގެ އެޑިޝަން ރަސްމީކޮށް އިފްތިތާޙްކޮށް ޕާޓްނަރުންނާއިއެކު ސޮއިކޮށްފިއެވެ.
ރާއްޖޭގެ ފަތުރުވެރިކަމުގެ ދާއިރާގައި ދޭ އެންމެ ޝަރަފްވެރި އެވޯޑްކަމަށްވާ މޯލްޑިވްސް ޓްރެވެލް އެވޯޑްސްގެ މިއަހަރުގެ އެޑިޝަން ރަސްމީކޮށް އިފްތިތާާޙްކުރީ ކޮކޯ ބޮޑުހިތި ރިސޯޓްގައި ބޭއްވި ޙާއްޞަ ރަސްމިއްޔާތެއްގައި މަޓާޓޯގެ ރައީސް އަބްދުﷲ ގިޔާސްއެވެ. މި ޙަފްލާއަށްފަހު ޕީއެސްއެމް ނިއުސްއަށް މަޢުލޫމާތު ދެއްވަމުން މަޓާޓޯގެ ޑެޕިއުޓީ ސެކްރެޓަރީ ޖެނެރަލް އަސްރާ ނަސީމް ވިދާޅުވީ މިއަހަރުގެ ޓްރެވެލް އެވޯޑްސްގެ އެޑިޝަންތައް މަދުވިނަމަވެސް އެއްވެސް އެވޯޑެއް އުނިކޮށް އަދި އިތުރުކޮށްފައި ނުވާ ކަމަށެވެ. މިއަހަރު އޮންނާނީ 2 އެޑިޝަނެއްކަމަށާއި އެއީ ގެސްޓްހައުސް އެޑިޝަނާއި ގާލާ އެޑިޝަން ކަމަށް އަސްރާ ވިދާޅުވިއެވެ. މިއަހަރު ވަނީ ގާލާ އެޑިޝަންއާއި ޕީޕަލްސް އެޑިޝަން އެއްކޮށްލައިގެން ކުރިއަށްގެންދަން ނިންމާފައެވެ.
"މިއަހަރު އޮންނާނީ 2 އެޑިޝަން މިދިޔަ އަހަރާއި ޚިލާފަށް. ދެން އެހެން ނަމަވެސް ޓްރެވެލް އެވޯޑްގެ އިތުރުން އޮންނާނެ އަޅުގަނޑުމެން ކޮންމެ އަހަރަކު މި ބާއްވާ ޓްރެވެލް ކޮންފަރެންސް. ފުރަތަމަ މި އޮންނަނީ ގެސްޓްހައުސް އެޑިޝަން. ގެސްޓްހައުސް އެޑިޝަން ބާއްވަން ހަމަޖެހިފަ މިއޮތީ ޖުލައިމަހު. ދެން ގާލާ އެޑިޝަން އަޅުގަނޑުމެން ގަސްތުކޮށްގެން މިތިބީ ނޮވެމްބަރ ގައި ނުބާއްވަން. އަޅުގަނޑުމެން މިއަހަރު ގަސްތުކޮށްގެން މިތިބީ އޮގަސްޓް ހިސާބުގަ ބާއްވަން." އަސްރާ ނަސީމް ވިދާޅުވިއެވެ.
މޯލްޑިވްސް ޓްރެވެލް އެވޯޑްސްގެ މިއަހަރުގެ ފްލެޓިނަމް ޕާޓްނަރަކަށް އުރީދޫ މޯލްޑިވްސް ވަނީ ހަމަޖައްސާފައެވެ. ގޯލްޑް ޕާޓްނަރަކީ މޯލްޑިވްސް އެއަރޕޯޓްސް ކޮންޕެނީ ލިމިޑެޓް (އެމްއޭސީއެލް) އެވެ. މިއަހަރުގެ މޯލްޑިވްސް ޓްރެވެލް އެވޯޑްސްގެ ސިލްވަރ ޕާޓްނަރަކީ އެލައިޑް އިންސުއަރެންސް އަދި ޕްރިންޓިންގ ޕާޓްނަރަކީ ޕްރިންޓް ލެބް އެވެ. މީގެ އިތުރުން އޮންލައިން ޕާޓްނަރަކަށް ސަން އޮންލައިން ހަމަޖެއްސިއިރު ޓްރެވެލް މީޑިއާ ޕާޓްނަރަކީ މޯލްޑިވްސް އިންސައިޑަރއެވެ. މޯލްޑިވްސް ޓްރެވެލް އެވޯޑުގެ ވީޑިއޯގުރަފީ ޕާޓްނަރަކަށް ނާރން ޕްރައިވެޓް ލިމިޑެޓް ހަމަޖެހިފައިވާއިރު، ފޮޓޯގުރަފީ ޕާޓްނަރަކީ ޑިޖިޓަލް ސްޓޫޑިއޯއެވެ. އަދި އެޑްވަޓައިޒިން ޕާޓްނަރަކީ ބްލަކް އެވެ. އަދި ޑިޖިޓަލް ޕާޓްނަރަކީ ކޯޑްފްލައިއެވެ.
މިއީ މަޓާޓޯއިން މޯލްޑިވްސް ޓްރެވެލް އެވޯޑް ބާއްވާ 7 ވަނަ އަހަރެވެ. މަޓާޓޯއިން އަންނަނީ ރާއްޖެ ޑެސްޓިނޭޝަނެއްގެ ގޮތުގައި ބޭރުދުނިޔެއަށް ޕްރޮމޯޓްކުރުމަށް ގިނަ ހަރަކާތްތަކެއްވެސް ހިންގަމުންނެވެ.