ޖޭޑަބްލިއު މެރިއޮޓް ބްރޭންޑުން ރާއްޖޭގައި ހުޅުވާ 4 ވަނަ ރިސޯޓް ނޮވެމްބަރ މަހުގެ ތެރޭގައި ހުޅުވުމަށް ތައްޔާރުވަމުންދާކަމަށް އެ ކުންފުނިން ބުނެފިއެވެ. ޖޭޑަބްލިއު މެރިއޮޓް މޯލްޑިވްސް ރިސޯޓް އެންޑް ސްޕާގެ ނަމުގައި ހުޅުވާ މި ރިސޯޓަކީ ށ އަތޮޅުގައި ހުޅުވާ ރިސޯޓެކެވެ.
މި ރިސޯޓްގައި 61 ވިލާ ހުންނާނެއެވެ. އަދި ކޮންމެ ވިލާއެއްގައި ޕްރައިވެޓް ޕޫލްއެއް ހުންނާނެކަމަށް އެ ރިސޯޓުން މައުލޫމާތުދެއެވެ. ރިސޯޓް ހުޅުވާއިރު ޓްރީޓޮޕް ރެސްޓޯރެންޓެއްވެސް ހުންނާނެއެވެ.
ވެލާނާ އިންޓަނޭޝަނަލް އެއަރޕޯޓުން ސީޕްލޭންއެއްގައި މި ރިސޯޓަށް 55 މިނެޓުން ދެވޭނެއެވެ. މި ރިސޯޓަށް ޒިޔާރަތްކުރާ ފަތުރުވެރިންގެ ތެރެއިން ރާޅުޖަހާ ހިތްގައިމު އަޑުއަހާލަން ބޭނުންވާ ގެސްޓުންނަށް ޙާއްސަކޮށްގެން 32 ވިލާ ހުންނާނެކަމަށް އެ ރިސޯޓުން ބުނެއެވެ.
ޖޭޑަބްލިއު މެރިއޮޓް ބްރޭންޑުން ރާއްޖޭގައި ހިންގާ ރިސޯޓްތަކުގެ ތެރޭގައި މޯލްޑިވްސް ވޮއްމުލި ރިސޯޓްއާއި، ސެރެޓަން މޯލްޑިވްސް ފުލްމޫން ރިސޯޓް އެންޑް ސަޕާގެ އިތުރުން ޑަބްލިއު މޯލްޑިވްސް ހިމެނެއެވެ.
ރާއްޖޭގެ ފަތުރުވެރިކަން ތަރައްޤީކުރުމަށް ސަރުކާރުން ކުރަމުންދާ މަސައްކަތުގެ ދަށުން ސަރުކާރުގެ އަމާޒަކީ މިއަހަރުގެ ތެރޭގައި ރާއްޖޭގައި 20 ރިސޯޓް ހުޅުވުމެވެ.