މޯލްޑިވްސް އެސޯސިއޭޝަން އޮފް ޓްރެވެލް އެޖެންޓްސް އެންޑް ޓުއަރ އޮޕަރޭޓާރސް (މަޓާޓޯއިން) މޯލްޑިވްސް ޓްރެވެލް އެވޯޑްސްގެ މިއަހަރުގެ ޕީޕަލްސް އެޑިޝަން ރަސްމީކޮށް އިފްތިތާހްކޮށްފިއެވެ. މި އެޑިޝަން އިފްތިތާހްކޮށްދެއްވީ ވަންއެންޑް އޮންލީ ރީތިރަށް ރިސޯޓްގައި ބޭއްވި ޙާއްސަ ހަފްލާއެއްގައި މަޓާޓޯގެ ރައީސް ޢަބްދުއްﷲ ޤިޔާސްއެވެ.
މަޓާޓޯއިން މޯލްޑިވްސް ޓްރެވެލް އެވޯޑްސްގެ ބައެއްގެ ގޮތުގައި 2017 ވަނަ އަހަރު ތައާރަފްކުރި ޕީޕަލްސް އެޑިޝަންއަކީ ފަތުރުވެރިކަމުގެ ދާއިރާގައި ގިނަ ދުވަހު ޚިދުމަތް ކޮށްދީފައިވާ ފަރާތްތަކެއްގެ އަގު ވަޒަންކުރުމުގެ ގޮތުން ދޭ އެވޯޑެކެވެ.
ދެވަނަ ޕީޕަލްސް އެޑިޝަން އިފްތިތާހްކުރުމަށްފަހު ޕީއެސްއެމް ނިއުސްއަށް މައުލޫމާތުދެއްވަމުން މަޓާޓޯގެ ރައީސް ޢަބްދުއްﷲ ޤިޔާސް ވިދާޅުވީ މިދިޔަ އަހަރު ޕީޕަލްސް އެޑިޝަން ވަކި ބައެއްގެ ގޮތުގައި ކުރިއަށްގެންދިޔަ ނަމަވެސް މިއަހަރު މި އެޑިޝަން ކުރިއަށްގެންދާނީ ގާލާ ނައިޓްއާއި އެއްކޮށްލައިގެން ކަމަށެވެ. އެގޮތުން މިހާރުން ފެށިގެން ދެ މަސްދުވަހުގެ މުއްދަތަކަށް އެވޯޑަށް ނޮމިނޭޓް ކުރުމުގެ ފުރުޞަތު ހުޅުވާލާފައިވާކަން ޤިޔާސް ފާހަގަކުރެއްވިއެވެ. ޕީޕަލްސް އެޑިޝަންއަށް އަމިއްލަގޮތުންވެސް ކުރިމަތިލުމުގެ ފުރުޞަތު ހުޅުވާލާފައިވާއިރު، އެހެން މީހެއްގެ ނަން ނޮމިނޭޓް ކުރަން ބޭނުންނަމަ އެ ފުރުޞަތުވެސް ހުޅުވާލާފައިވާކަމަށް ޤިޔާސް ވިދާޅުވިއެވެ.
"މިއަހަރު އަޅުގަނޑުމެން އޮކްޓޯބަރ ގައި އަޅުގަނޑުމެން މިބަލަނީ އަޅުގަނޑުމެންގެ ގާލާ ނައިޓާއި އެކީގަ ޕީޕަލްސް އެޑިޝަން ބާއްވާ ގޮތައް. ދެއިވެންޓް އެއްރޭ. ނޮމިނޭޓް ކުރުން މިއޮންނަނީ އަޅުގަނޑުމެންގެ ވެބްސައިޓް ތުރޫކޮށާއި، އަޅުގަނޑުމެންގެ އިންނާނެ ވަކި ފޯމެއް. ހަމަ ދެގޮތައްވެސް އެމީހަކު އަމިއްލައަށްވެސް ނޮމިނޭޓް ކުރެވޭނެ. އެހެންނޫނީ ކޮންމެ އެހެން މީހަކު ޓުރޫކޮށްވެސް ތާރޑް ޕާޓީއެއް ޓުރޫކޮށްވެސް ނޮމިނޭޓް ކުރެވޭ ގޮތައް އިންނާނީ." އަބްދުއްﷲ ޤިޔާސް ވިދާޅުވިއެވެ.
މިދިޔަ އަހަރު 10 ފަރާތަކަށް މި އެވޯޑް ދީފައިވާއިރު މިއަހަރު އެވޯޑް ދިނުމަށް ހަމަޖެހިފައިވަނީ 5 ފަރާތަކަށްކަމަށް މަޓާޓޯއިން ބުނެއެވެ. ނަމަވެސް 2019 ވަނަ އަހަރު މިއަދަދު އިތުރުކުރާނެކަމަށްވެސް މަޓާޓޯއިން ބުނެއެވެ. އެވޯޑު ލިބޭ ފަރާތްތައް ކަނޑައަޅާނީ ފަތުރުވެރިކަމުގެ ދާއިރާގައި ގިނަ ދުވަހު ޚިދުމަތްކޮށްފައިވާ ފަރާތްތަކެއްގެ މައްޗަށް އެކުލެވޭ ޖަޖިންގ ޕެނަލަކުންނެވެ.
ޕީޕަލްސް އެޑިޝަން ލޯންޗްކުރުމަށް ބޭއްވި ހަފްލާގައި މަޓާޓޯއާއި ޔޫއެންޑީޕީއާއި ގުޅިގެން މަސައްކަތްކުރުމަށް ވަނީ ޕާރޓްނަރޝިޕް އެގްރީމެންޓެއްގައިވެސް ސޮއިކޮށްފައެވެ. މި އެއްބަސްވުމުގައި ސޮއިކުރެއްވީ މަޓާޓޯގެ ރައީސް ޢަބްދުއްﷲ ޤިޔާސްއާއި ޔޫއެންޑީޕީން ރާއްޖެއަށް ކަނޑައަޅުއްވާފައި ހުންނަވާ ސަފީރު ޝޯކޯ ނޯޑާއެވެ. މި އެއްބަސްވުމުގެ ދަށުން ޔޫއެންޑީޕީއާއި މަޓާޓޯ ގުޅިގެން ރާއްޖޭގެ ފަތުރުވެރިކަން ދެމެހެއްޓެނިވި ގޮތެއްގައި ކުރިއެރުވުމަށް މަސައްކަތްތަކެއް ކުރެވިގެންދާނެކަމަށް މަޓާޓޯއިން ބުނެއެވެ. އޭގެތެރޭގައި އެކި ކަންކަމުގައި ޓްރެއިނިންގ ދިނުމާއި، މޫސުމަށް އަންނަ ބަދަލުތަކާއި، ޒުވާނުންނާއި އަންހެނުން ބާރުވެރިކުރުވުން ހިމެނޭކަމަށްވެސް މަޓާޓޯއިން ބުނެއެވެ.
މިއަހަރުގެ ޕީޕަލްސް އެޑިޝަން އޮންނާނީ ޓްރެވެލް އެވޯޑްސްގެ ގާލާ އާއެކު އޮކްޓޯބަރ މަހުގެ ތެރޭގައެވެ. އަދި ގެސްޓްހައުސް އެޑިޝަން އޮންނާނީ އޮގަސްޓް މަހުގެ ތެރޭގައެވެ. މިއީ މަޓާޓޯއިން މޯލްޑިވްސް ޓްރެވެލް އެވޯޑް ބާއްވާ 7 ވަނަ އަހަރެވެ.