މިމަހު ފަހުކޮޅު ސަޢުދީ ޢަރަބިއާގެ ވެރިރަށް ރިޔާޛުގައި ބޭއްވުމަށް ހަމަޖެހިފައިވާ "ރިޔާޛް 2019 ޓްރެވަލް ފެއަރ"ގައި މަޓާޓޯއާއި އެކު ރާއްޖޭގެ ފަތުރުވެރިކަމުގެ ސިނާއަތުގައި ހަރަކާތްތެރިވާ 4 ކުންފުންޏަކުން ބައިވާނެ ކަމަށް މަޓާޓޯއިން ހާމަކޮށްފިއެވެ.
މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއަރ އޮޕަރޭޓަރސް، މަޓާޓޯއިން ބުނީ މިމަހުގެ 28 އިން މާރޗުމަހުގެ 30 ވަނަ ދުވަހުގެ ނިޔަލަށް ކުރިއަށްދާ ރިޔާޛް ފެއަރގައި ރާއްޖެ ތަމްސީލްކުރުމަށް މާޓާޓޯގެ ފަރާތުން ޑެސްޓިނޭޝަން ސްޓޭންޑެއް ބެހެއްޓުމަށް ވަނީ ހަމަޖެހިފައިއެވެ.
މިފެއަރ މެދުވެރިކޮށް މެދުއިރުމަތީގެ ޤައުމުތަކުގެ ޓްރެވަލް އެޖެންޓުންނާއި ދިވެހި ވިޔަފާރިވެރިންނާއި ގުޅުވާލުމުގެ ފުރުސަތު މާޓާޓޯއިން ފަހިކޮށްދޭނެކަމަށް އެ އެސޯސިއޭޝަނުން ހާމަކުރެއެވެ.
ރާއްޖެއަށް ޒިޔާރަތްކުރާ ފަތުރުވެރިންގެ %3.5 އަކީ މެދުއިރުމަތީގެ ޤައުމުތަކުން އަންނަ ފަތުރުވެރިންނެވެ. ޓޫރިޒަމް މިނިސްޓްރީގެ ތަފާސްހިސާބުތައް ދައްކާގޮތުން، މެދު އިރުމަތީގެ ޤައުމުތަކުގެ ތެރެއިން ރާއްޖެއަށް އެންމެ ގިނަ އަދަދަކަށް ފަތުރުވެރިން ޒިޔާރަތްކުރަނީ ސަޢުދީންނެވެ.
އެގޮތުން ހުސްވި އަހަރު އެޤައުމުން 23،540 ފަތުރުވެރިން ރާއްޖެއަށް ޒިޔާރަތްކޮށްފައިވާއިރު، މިއީ 2017ވަނަ އަހަރުގެ އެމުއްދަތާއި އަޅާ ބަލާއިރު %1.6 އިތުރު އަދަދެކެވެ.
ރާއްޖޭގެ ފަތުރުވެރިކަން ދުނިޔޭގެ އެކި ހިސާބުތަކުގައި އިޝްތިހާރުކޮށް، އެކި ޤައުމުތަކުގައި ބާއްވާ ފެއަރތަކުގައި ދިވެހި ކުންފުނިތަކަށް ބައިވެރިވުމުގެ ފުރުސަތު ފަހިކޮށް ދިނުމަށްޓަކައި މަޓާޓޯއިން ދަނީ ގިނަ މަސައްކަތްތަކެއް ކުރަމުންނެވެ. އެގޮތުން މަޓާޓޯއިން ވަނީ މިއަހަރުތެރޭގައި 15 ފެއާއެއްގައި ބައިވެރިވުމަށް ނިންމާފައެވެ.