އެޕަލްގެ އުފެއްދުންތައް އިންސްޓޯލްމެންޓަށް ގަނެވޭ ޚިދުމަތެއް އެމެރިކާގެ މަލްޓިނޭޝަނަލް ޓެކްނޮލޮޖީ ކުންފުނި އެޕަލްއިން ތަޢާރަފްކުރަން މަސައްކަތްކުރާކަމަށް މީޑިއާތަކުން ރިޕޯޓް ކޮށްފިއެވެ.
'ބައި ނައު ، ޕޭ ލޭޓަރ'ގެ ނަން ދީފައިވާ މި ޚިދުމަތުން އެޕަލްގެ ކޮންމެ އުފެއްދުމެއްވެސް އިންސްޓޯލެމެންޓަށް ގަނެވޭނެއެވެ.
އެޕަލްއިން ބުނާ ގޮތުން މި ޚިދުމަތުގެ ދަށުން އެޕަލްގެ މި ޚިދުމަތް ބޭނުންކުރާ ފަރާތްތަކަށް އިންޓްރެސްޓް ނުހިމެނޭގޮތަށް 4 އިންސްޓޯލްމެންޓަކަށް ބަހާލައިގެން ކޮންމެ ދެ ހަފްތާއަކުން ފައިސާ ދެއްކުމުގެ ފުރުޞަތުވެސް އޮންނާނެކަމަށާއި މީގެއިތުރުން އިންޓްރެސްޓާއިއެކު މަސްތަކަކަށް ބަހާލައިގެންވެސް ފައިސާ ދެއްކިދާނެއެވެ.
މި ޚިދުމަތުގެ ދަށުން އެޕަލްގެ ކަސްޓަމުރުންނަށް ލޯނުދޭ ފަރާތެއްގެ ގޮތުގައި ކަނޑައަޅާނީ 2019 ވަނަ އަހަރުން ފެށިގެން އެޕަލްގެ ކްރެޑިޓް ކާޑްގެ ބައިވެރިޔާ ގޯލްޑްމޭންއެވެ.
މަހުންމަހަށް ނަގާ އިންޓްރެސްޓް ރޭޓުގެ ތަފްޞީލު އަދި ނޭނގޭއިރު އެޕަލްގެ އެހެން ވާދަވެރިންކަމަށްވާ 'އެފާރމް'އިން އެމީހުންގެ އުފެއްދުންތަކުން 30 އިންސައްތަ އިންޓްރެސްޓް ނަގައެވެ. އާފްޓަރ ޕޭ ލިމިޓެޑް، ސެޒްލް އިންކް އިންވެސް ވާދަވެރި ރޭޓްތަކެއް ކަނޑައަޅާނެކަމަށް ބެލެވެއެވެ.
އައިފޯން ވޮލެޓް އެޕް މެދުވެރިކޮށް ބައިވެރިވެވޭ މި ޚިދުމަތް ހޯދުމަށް ބޭނުންވާ ފަރާތްތަކުން އައިޑީކާޑު ކޮޕީއެއް ހުށަހަޅަންޖެހެއެވެ. މީގެއިތުރުން ވަގުތީ ގޮތުން ބޭނުން ކުރެވޭނެ ޑިޖިޓަލް އެޕަލް ޕޭ ލޭޓަރ ކްރެޑިޓް ކާޑް ފީޗައެއްވެސް ތަޢާރަފްކުރުމުގެ މަސައްކަތް އެޕަލްއިން ދަނީ ކުރަމުންނެވެ.
އެޕަލްގެ މި އައު ޚިދުމަތް އަދިވެސް ތަރައްޤީކުރަމުންދާތީ މި ޚިދުމަތުގެ ފީޗަރސްތަކަށް ބަދަލުއައުން އެކަށީގެންވާކަމަށް ޚަބަރުތައް ބުނެއެވެ. ޚިދުމަތާއި ގުޅޭގޮތުން އެޕަލްއިންވެސް އަދި ގޯލްޑްމޭންއިންވެސް މިހާތަނަށް އެއްޗެއް ބުނެފައެއް ނެތެވެ.
ގޯލްޑްމޭންސްގެ ޗީފް ފައިނޭނިޝިއަލް އޮފިސަރ މީގެކުރިން ބުނެފައިވާގޮތުގައި އެޕަލްއާއިއެކު ރަނގަޅު އިތުރު ފުރުޞަތުތަކެއް ކުރިއަށް އެބަހުއްޓެވެ. އައިފޯން ބޭސްޑް މި ޚިދުމަތް އެމެރިކާގެ 85 އިންސައްތަ ރީޓެއިލް ފިހާރަތަކުން ވަނީ ޤަބޫލުކޮށްފައެވެ. 2014 ވަނަ އަހަރު ލޯންޗްކުރި އެޕަލްގެ ޚިދުމަތްތަކުގެ ތެރެއިން މި ޚިދުމަތަކީ އެޕަލްއިން ތަޢާރަފްކުރާ އެންމެ ބޮޑު ޚިދުމަތެވެ.