ރާއްޖޭގައި ހިމާޔަތްކޮށްފައިވާ މަޑީގެ ބާވަތްތަކަށް ގޯނާވެދާނެ އެއްވެސް ކަމެއް ނުކުރުމަށް އެންވަޔަރަންމަންޓް ޕްރޮޓެކްޝަން އެޖެންސީން އިލްތިމާސްކޮށްފިއެވެ.
އިޕީއޭގެ ނެރުނު ބަޔާނެއްގައިވަނީ ސްނޯކްލިންއާއި، ޑައިވިންއާއި ކްރޫޒިންއާއި މޫދަށް އެރި އުޅުން ފަދަ ކަންކަމުގައި، ބައެއް ފަހަރު މަޑީގެ ބާވަތްތަކަށް ގޯނާވާ ފަދަ އަމަލުތައް ކުރެވޭކަމަށެވެ. އެހެންކަމުން އެތަކެއްޗަށް ގޯނާ ނުވާނެ ގޮތަށް ކަންކަން އިންތިޒާމު ކުރުމަށް އީޕީއޭއިންވަނީ އިލްތިމާސްކޮށްފައެވެ.
އީޕީއޭއިން ބުނީ ގުދުރަތީ ގޮތުން ނުވަތަ ތަބީއީ ގޮތުގައި ހިމާޔަތްކޮށް ރައްކާތެރިކުރާ ދިރޭ ތަކެއްޗާ ބެހޭ ގަވާއިދުގެ ދަށުން ރާއްޖޭގެ ކަނޑުފަޅުތަކުގައި އުޅޭ ހުރިހާ ބާވަތެއްގެ މަޑިއަކީ ހިމާޔަތްކުރެވިފައިވާ އެއްޗެތި ކަމަށެވެ. އެހެންކަމުން މަޑީގެ ހަރަކާތްތައް ބަލާ، ކަނޑުގައި އެތަކެތި އުޅޭ ސަރަހައްދުގައި ދުއްވާއިރު އެ ތަކެއްޗާ އުޅަނދާ ދެމެދު ތިން މީޓަރުގެ ދުރުމިނެއް ބެހެއްޓުމަށް އީޕީއޭއިން ވަނީ އެދިފައެވެ. އަދި ބައެއް ބާވަތުގެ މަޑިއަކީ ކާނާ ހޯދަން ކަނޑުގެ ލޮނުގަނޑުން މައްޗަށް އަރާ ބާވަތުގެ މަޑިއަށްވާތީ، އެ ކަމަށް ސަމާލުވެ، މަޑުން އުޅަނދު ދުއްވަން ވެސް ވަނީ ނަސޭހަތްތެރިވެފައެވެ.
އެގޮތުން އެންމަޑިއާއި، ވައިފިޔަމަޑިއާއި މި ނޫނަސް މަޑީގެ ގިނަ ބާވަތްތަކަކީ، ބައިނަލްއަގްވާމީ އެކި މުއާހަދާތަކުން ނެތިދާނެކަމުގެ ބިރު ފާޅުކޮށްފައިވާ ތަކެެތިކަމަށް އީޕީއޭއިން ބުނެއެވެ. އަދި އެންމެ ބިރު ބޮޑީ، ރީފް މަންތާރޭއާއި ޖަޔަންޓް އޯޝަނިކް މަންތާރޭ ނެތިދާނެތީ ކަމަށް އިޕީއޭގެ ބަޔާނުގައިވެއެވެ.
މީގެ އިތުރުން މި ދިރުންތަކަކީ މި ސަރަހައްދުގެ އެހެން ގައުމުތަކުން ވަރަށް ފުޅާ ދާއިރާއެއްގައި، ބާނަމުންދާ ދިރުންތަކަކަށްވެފައި، ވިހާ އަލާވުމަށް ދިގު މުއްދަތެއް ނަގާ ދިރުންތަކަކަށްވާތީ، އޭގެ އާބާދީތައް ދެމެހެއްޓުމުގައި ދިވެހިރާއްޖޭގެ އަމާން ކަނޑުފަޅުގެ ސަރަހައްދުތައް ވަރަށް މުހިންމު ދައުރެއް އަދާކުރަން ޖެހެއެވެ.
މީގެ އިތުރުން އެފަދަ ދިރުމަކަށް ގެއްލުން ލިބިދާނެ އެއްވެސް ކަމެއް ކުރުމަކީ މަނާކަމެއް ކަމަށާއި އެ ކަން ކުރާނަމަ ޤާނޫނީ ގޮތުން ފިޔަވަޅު އަޅާނެކަމަށް އީޕީއޭއިންވަނީ ހާމަކޮށްފައެވެ.