ސިނގިރޭޓް އޮޕަރޭޝަނުގައި 103 ފޮށިގަނޑު އަތުލައިގަތް: ފުލުހުން

މާލޭގައި ސިނގިރޭޓު އުފައްދަމުންދާކަމަށް ތުހުތުކުރެވޭ ތަނެއް ބަލައި ފާސްކުރުމަށް ރޭ ހިންގި އޮޕަރޭޝަނުގައި 103 ފޮށިގަނޑު އަތުލައިގެންފައިވާ ކަމަށް ދިވެހި ފުލުހުންގެ ޚިދުމަތުން ވިދާޅުވެއްޖެއެވެ.

މި އޮޕަރޭޝަނުގައި ދިވެހި ފުލުހުންގެ ޚިދުމަތުން ވަނީ ހެންވޭރު ގެއެއްގައި ހިންގާ ޕްރައިވެޓް އޮފީހެއްގެ ތެރޭގައި ސިނގިރޭޓު އުފައްދާކަމަށް ލިބިފައިވާ މަޢުލޫމާތަކާ ގުޅިގެން ކޯޓު އަމުރެއްގެ ދަށުން އެތަން ބަލައި ފާސްކޮށްފައެވެ. މި އޮޕަރޭޝަނުގައި އެތަނުން ގިނަ އަދަދެއްގެ ކާޑްބޯޑު ފޮށިގަނޑުތަކެއް ފުލުހުން ވަނީ އެ މުއައްސަސާގެ ބެލުމުގެ ދަށަށް ގެންގޮސްފައެވެ.

ފުލުހުން މީޑިއާތަކާ ހިއްސާކުރެއްވި މެސެޖެއްގައި ވިދާޅުވީ މި އޮޕަރޭޝަނުގައި ކާޑްބޯޑު 103 ފޮށިގަނޑު އަތުލައިގަނެފައިވާ ކަމަށެވެ. މީގެ ތެރޭގައި ދުންފަތް ހުރި ފޮށިތައްވެސް ހިމެނޭ ކަމަށް ފުލުހުން ވިދާޅުވިއެވެ.

ދުންފަތް ކޮންޓްރޯލްކުރުމާ ބެހޭ ޤާނޫނަށް މިދިޔަ އަހަރު ގެނައި އިސްލާހުގެ ދަށުން ދުންފަތުގެ އެއްވެސް ބާވަތެއް ރާއްޖޭގައި އުފެއްދުމަކީ މިހާރު މަނާ ކަމެކެވެ. އަދި ދުންފަތް އިސްތިހާރުކުރުމަކީވެސް މަނާކަމެކެވެ. އަދި ދުންފަތުގެ ބާވަތްތަކުގެ ތެރެއިން ސިނގިރޭޓް ރާއްޖޭގައި ވިއްކޭނީ ވަކި ޚާއްސަ ހުއްދައެއް ނަގައިގެން ޚާއްސަ ލޭބަލެއް އޭގައި ޖަހައިގެންނެވެ.

މީގެއިތުރުން އިސްލާހުގައި ވަނީ ދިވެހިރާއްޖޭގައި ދުންފަތުގެ އެއްވެސް ބާވަތެއްގެ ގަހެއް، އެއްވެސް މިންވަރަކަށް ހެއްދުމަކީ ނުވަތަ ދިވެހިރާއްޖޭގައި އެއްވެސް މިންވަރަކަށް ދުންފަތް އުފެއްދުމާއި އެތެރެކުރުންވެސް މަނާކޮށްފައެވެ.