ކުމުންދޫގެ ޞިއްޙީ މަރުކަޒު އެކްސްޓެންޝަން އިމާރާތުގެ އަމަލީ މަސައްކަތް ފަށައިފި

ހދ. ކުމުންދޫ ޞިއްޙީ މަރުކަޒު އެކްސްޓެންޝަން އިމާރާތުގެ އަމަލީ މަސައްކަތް ފަށައިފިއެވެ. މި މަސައްކަތް ހަވާލުކޮށްފައިވަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ، އެމްޓީސީސީއާިއެވެ.

ކުމުންދޫ ސިއްޙީ މަރުކަޒު އެކްސްޓެންޝަން އިމާރާތުގެ އަމަލީ މަސައްކަތް ފައްޓަވައިދެއްވީ ސިއްހަތާއި ބެހޭ ވަޒީރު އަބްދުﷲ ނާޒިމްއެވެ. އަރިހުގައި އެމްޓީސީސީގެ މެނޭޖިން ޑިރެކްޓަރ ޑ.ީސ.ީޕީ (ރޓ) އަޙްމަދު ސަޢުދީއެވެ. އަދި ކައުންސިލްގެ ރައީސް ވަނީ ބައިވެރިވެފައެވެ.

މި މަޝްރޫޢުގެ ދަށުން 7,800 އަކަފޫޓުގެ ސަރަޙައްދެއްގައި 2 ފަންގިފިލާގެ އިމާރާތެއް ބިނާކުރުމުގެ މަސައްކަތް ކުރުމަށްވަނީ ހަމަޖެހިފައެވެ. މީގެ އިތުރުން ބިންގަނޑު ކޮނުމާއި، މޭސަނަރީ، ކޮންކްރީޓް މަސައްކަތް ކުރުމާއި، ޓައިލްސް ޖެހުމާއި، ދޮރާއި ކުޑަދޮރު ހަރުކުރުމާއި، ދަވާދުލުމާއި، ދަގަނޑު މަސައްކަތްތަކާއި ހައިޑްރޯލިކްސް އަދި ޑްރެއިނޭޖް މަސައްކަތްތައް ކުރުން ހިމެނެއެވެ. އަދި ކަރަންޓު ވަޔަރު ކުރުމާއި، މެޑިކަލް ގޭސް ސިސްޓަމެއް ހަރުކުރުމާއި، އެއަރ ކޮންޑިޝަން ސިސްޓަމެއް ހަރުކުރުމާއި، އަލިފާން ނިއްވާ ނިޒާމެއް ހަރުކުރުމުގެ މަސައްކަތްވެސް ކުރުން ހިމެނެއެވެ. މި މަޝްރޫޢު އެމްޓީސީސީއާ ޙަވާލުކޮށްފައިވަނީ 27.26 މިލިއަން ރުފިޔާއަށް 360 ދުވަސްތެރޭ ނިންމުމަށެވެ.

އަތޮޅުތަކުގެ ސިއްހީ މަރުކަޒުތައް ޒަމާނީ ފެންވަރަށް ތަރައްޤީކޮށް ރައްޔިތުންނަށް ފެންވަރު ރަނގަޅު ޙިދުމަތްދިނުމަކީ ސަރުކާރުގެ އަމާޒެއްކަމަށެވެ. އެގޮތުން ސަރުކާރުން މިހާރު ފައްޓާފައިވާ ސިއްހީ އެކި މަޝްރޫއުތައް ނިމިގެންދާއިރު އަތޮޅު ތެރޭގެ ސިއްހީ ނިޒާމުގައި ހުރި ގޮންޖެހުންތައް ހައްލުވެގެންދާނެކަމަށެވެ.

މިއަހަރާއި އަންނަ އަހަރުގެ ބަޖެޓާއި އެކު އަތޮޅުތެރޭގެ ސިއްހީ ނިޒާމުގެ ކަންކަން ހައްލުވެގެންދާނެކަމަށް ސަރުކާރުން ވިދާޅުވެ. އެގޮތުން މުހިންމު ފަރުވާތައް ރަށުގައި ނުވަތަ އަތޮޅުގައި ތިބެގެން ކުރެވޭނެ މަގު ފަހިވެގެންދާނެއެވެ.