ރާއްޖޭގައި ވިޔަފާރިކުރުމުގައި ހުރި ދަތިތައް ޙައްލުކުރެއްވުމަށް ސަރުކާރުން މިއަހަރުގެ ތެރޭގައި ޚާއްޞަ އިސްކަމެއް ދެއްވާނެކަމަށް މިނިސްޓަރ އޮފް އިކޮނޮމިކް ޑިވެލޮޕްމަންޓު މުޙައްމަދު ސަޢީދު ވިދާޅުވެއްޖެއެވެ.
ވާރލްޑް ބޭންކުގެ "ޑުއިންގ ބިޒްނަސް" ގެ ރާއްޖޭގެ ރޭންކިންގ ރަނގަޅުކުރެއްވުމަށް، ގުޅިގެން ކުރެވިދާނެ ކަންތައްތަކާ ބެހޭގޮތުން ލޯފާމްތަކާއެކު އިކޮނޮމިކް މިނިސްޓްރީން މިއަދު ބޭއްވެވި މަޝްވަރާ ބައްދަލުވުމުގައި މިނިސްޓަރ ވިދާޅުވީ ދިވެހިރާއްޖެއަކީ ފުދުންތެރި، ވިޔަފާރިއަށް ފަހި މާޙައުލެއް އޮތް ޤައުމަކަށް ހެއްދެވުމަށް ސަރުކާރުން މިއަހަރުގެ ތެރޭގައި ގިނަ މަސައްކަތްތަކެއް ކުރައްވާނެ ކަމަށެވެ. އެގޮތުން ސަރުކާރުގެ އަމާޒަކީ "އީޒް އޮފް ޑުއިން ބިޒްނަސް" ރޭންކިންގެ އެންމެ ކުރީގައި ހިމެނޭ ފަންސާސް ޤައުމުގެ ތެރޭގައި ރާއްޖެ ހިމެނުއްވުން ކަމަށް މިނިސްޓަރ ސަޢީދު ވިދާޅުވިއެވެ.
ވިޔަފާރި ހިންގަން ފަސޭހަ މާޙައުލެއް އޮންނަނީ ކިހާވަރަކަށްތޯ ވަޒަންކުރާ ވާރލްޑް ބޭންކްގެ އިންޑެކްސް، "އީޒް އޮފް ޑްއިން ބިޒްނަސް" ގައި ރާއްޖޭގެ މިހާރުގެ ރޭންކިންއަކީ ސަތޭކަ ތިރީސް ފަސްވަނަ. މިއީ، ވިޔަފާރިތައް ހިންގަން ފަސޭހަވާނެ ދިހަ ކަމެއްގެ މައްޗަށް ބަލައި، 189 ޤައުމެއްގެ އިޤްތިޞާދު ދިރާސާކުރުމަށްފަހު ވަރލްޑް ބޭންކުން އެކުލަވާލާ އިންޑެކްސްއެކެވެ.
ވާރލްޑް ބޭންކުގެ ޑުއިންގ ބިޒްނަސް ރޭންކިންގ ރަނގަޅުކުރުމަށާއި، އެބޭންކުން ހަދާފައިވާ ރިފޯރމް މެމޮރެންޑަމްގައި ރަނގަޅުކުރުމަށް ފާހަގަކޮށްފައިވާ ކަންތައްތަކަށް ޢަމަލީ ސިފައެއް ގެންނަވައި، އެކަންކަން ކުރެއްވުމަށްޓަކައި، ސަރުކާރުގެ ވުޒާރާތަކާއި، ކަމާ ގުޅުންހުރި ފަރާތްތަކާއެކު ގެންދަވަނީ ފުޅާދާއިރާއެއްގައި މަޝްވަރާކުރައްވަމުން ކަމަށް އިކޮނޮމިން މިނިސްޓްރީން ވިދާޅުވެއެވެ.
އިކޮނޮމިކް މިނިސްޓަރ މުޙައްމަދު ސަޢީދު ވިދާޅުވީ، ވާރލްޑް ބޭންކުން ޑުއިންގ ބިޒްނަސް ރިޕޯޓަށް މައޢުލޫމާތު ހޯދަނީ އަމިއްލަ ފަރާތްތަކުން ކަމަށާއި، މަޢުލޫމާތުގައި މައްސަލަތަކެއް ހުންނަކަން ފާހަގަކުރެއްވޭ ކަމަށެވެ.
"ވޯލްޑް ބޭންކުގެ ޑުއިންގ ބިޒްނަސް އަށް ކޮލިފައިވުމުގައި ގިނަ ފަހަރު އެބޭފުޅުން މުއާމަލާތް މި ކުރައްވަނީ ރާއްޖޭގައި ހިދުމަތް ފޯރުކޮށްދޭ ނޮން ގަވަމެންޓަލް އޭޖެންސީސްތަކުގެ ވިއު މި ހޯދަވަނީ، ދެން އޭގައެބަހުރޭ ބައެއް ފަހަރު ހުރޭ، މިސާލަކަށް ކަރަންޓުލުމުގައި ދިވެހިރާއްޖޭގެ ރޭންކިންގ ވަރަށް ފަހަތުގައި، އެކަމަކު އެއީކީ ރެޝަނަލް ވާހަކައެއް ނޫން، ރާއްޖޭގެ އިޤްތިސާދަށް 80% ކޮންޓްރިބިއުޓު ކުރަނީ ޓޫރިޒަމުން، ރިސޯޓެއް ހުޅުވާއިރު، ވަކި ސްޓޭޓެއްހެން އެތަން ހުޅުވެނޭ، އެތަނުގައި ވަކި ކަރަންޓާއި ފެނާއި ހުންނާނެ، އެތަނަށް ހުއްދަ ލިބެނީވެސް އެކަންތައް ހަމަވީމަ،" މިނިސްޓަރ ސައީދު ވިދާޅުވިއެވެ.
އިކޮނޮމިކް މިނިސްޓްރީގައި ބޭއްވެވި މިބައްދަލުވުމުގައި ރާއްޖޭގައި ޙަރަކާތްތެރިވާ ހަ ލޯ ފާމަކުން ބައިވެރިވިއެވެ.
ރާއްޖޭގައި ވިޔަފާރިކުރުމުގައި ހުރި ދަތިތައް ޙައްލުކޮށް، ވިޔަފާރިއަށް ފަހި މާޙައުލެއް ޤާއިމުކޮށް، އަދި "ޑުއިންގ ބިޒްނަސް ރޭންކިންގ" ރަނގަޅުކުރުމަށްޓަކައި، ވާރލްޑް ބޭންކުގެ ރިފޯރމް މެމޮރެންޑަމްގައި ފާހަގަކޮށްފައިވާ ކަންތައްތަކަށް ޢަމަލީ ސިފައެއް ގެންނަވައި، އެކަންކަން ކުރެއްވުމަށްޓަކައި، 2015 ވަނަ އަހަރު ރައީސުލްޖުމްހުރިއްޔާ ވަނީ ނޭޝަނަލް ޓްރޭޑް ފެސިލިޓޭޝަން ކޮމިޓީއެއް އުފައްދަވާފައެވެ.
އިކޮނޮމިކް މިނިސްޓްރީގެ ދަށުން ހިންގަވާ މިކޮމިޓީ ޗެއަރކުރައްވަނީ މިނިސްޓަރ އޮފް އިކޮނޮމިކް ޑިވެލޮޕްމަންޓު މުޙައްމަދު ސަޢީދެވެ.