ރާއްޖެއަށް މިއަހަރު ޒިޔާރަތްކުރި 1 މިލިއަން ވަނަ ފަތުރުވެރިޔާއަށް ވެލާނާ އިންޓަނޭޝަނަލް އެއަރޕޯޓުން ހޫނު މަރުޙަބާއެއް ކިޔައިފިއެވެ. އިސްތަންބޫލްގެ ރައްޔިތެއްކަމަށްވާ އުމުރުން 37 އަހަރުގެ ކޮރާލްޕް ރާއްޖެއައީ އޭނާގެ އަންހެނުންނާއިއެކު ހަނީމޫން ހޭދަކޮށްލުމަށެވެ.
ރާއްޖެއަށް މިއަހަރު ޒިޔާރަތްކުރި 1 މިލިއަން ވަނަ ފަތުރުވެރިޔާއަށް ވެލާނާ އިންޓަނޭޝަނަލް އެއަރޕޯޓުން މަރުޙަބާ ކިޔާފައިވަނީ އެމްއެމްޕީއާރުސީ އާއި އެމްއޭސީއެލާއި ޓޫރިޒަމް މިނިސްޓްރީގެ އިތުރުން ފަތުރުވެރިކަމުގެ ދާއިރާގައި މަސައްކަތްކުރާ އިސް ބޭފުޅުންނެވެ.
މިއަހަރު ރާއްޖެއައި 1 މިލިއަން ވަނަ ފަތުރުވެރިޔާ ރާއްޖެއައީ ޓާރކިޝް އެއަރލައިންގެ ފުލައިޓަކުންނެވެ. އިސްތަންބޫލްގެ ރައްޔިތެއްކަމަށްވާ ކޮރާލްޕްއާއި އޭނާގެ އަންހެނުން ރާއްޖެއައީ މިމަހުގެ 7 ވަނަ ދުވަހު އޮތް އެމީހުންގެ ކައިވެންޏަށްފަހު ހަނީމޫން ހޭދަކޮށްލުމަށެވެ. މީޑިއާއަށް މައުލޫމާތުދެމުން ކޮރާލްޕް ބުނީ ފްލައިޓުގައި އައިއިރުވެސް ރާއްޖޭގެ ރީތިކަމުގެ ވާހަކައާއި، ރާއްޖޭގައި ކުރާނެ ހިތްގައިމު ކަންތައްތަކާ ބެހޭގޮތުން 2 މީހުން ވާހަކަދެއްކިކަމަށެވެ. ނަމަވެސް ރާއްޖެއިން އެދެމަފިރިންނަށް ކީ މަރުޙަބާއަކީ އޭނާގެ އަންހެނުން އުންމީދުވެސް ކުރި މަރުޙަބާއެއް ނޫންކަމަށެވެ. އޭނާ ބުނީ މިއަހަރު ރާއްޖެއައި 1 މިލިއަން ވަނަ ފަތުރުވެރިޔާގެ ޝަރަފު ލިބުނީތީ ވަރަށް އުފާވާކަމަށެވެ. މިއީ އެމީހުން ރާއްޖެއައި ފުރަތަމަ ފަހަރުނަމަވެސް، މީގެފަހުން ކޮންމެ އަހަރަކުވެސް އެމީހުން ރާއްޖެ އަންނާނެކަމަށް އޭނާ ބުންޏެވެ.
އެއްމިލިއަން ވަނަ ފަތުރުވެރިޔާއަށް މަރުޙަބާ ކިއުމަށްފަހު ޓޫރިޒަމް މިނިސްޓްރީގެ ޑެޕިއުޓީ މިނިސްޓަރު ހުސެއިން ޟިރާރު ވިދާޅުވީ، ރާއްޖެ އަންނަ ފަތުރުވެރިންގެ ޢަދަދު އިތުރުކުރުމަށް މިހާރު ދިމާވެފައިވާ އެންމެ ބޮޑު ދައްޗަކީ އެއަރޕޯޓްގެ ޖާގައިގެ ދަތިކަންކަމަށެވެ. ނަމަވެސް އެއަރޕޯޓް ތަރައްޤީކުރުމުގެ ބިޔަ މަޝްރޫޢު ނިމުމާއެކު ރާއްޖޭގެ ފަތުރުވެރިކަމަށް ބޮޑު ކުރިއެރުމެއްލިބި، ގިނަ ޢަދަދެއްގެ ފަތުރުވެރިން އެއްފަހަރާ ރާއްޖެ ގެނެވޭނެކަމަށް އޭނާ ވިދާޅުވިއެވެ.
"އަޅުގަނޑު ދަންނަވާނީ ކުރިއަށްއޮތީ ވަރަށް ފާގަތި ދުވަސްތަކެކޭ ރާއްޖޭގެ ޓޫރިޒަމަށް އުފާވެރި ދުވަސްތަކެކޭ. އެއީ ވެލާނާ އިންޓަނޭޝަނަލް އެއަރޕޯޓާއި، ޑޮމެސްޓިކް އެއަރޕޯޓްތައް ތަރައްޤީވެގެން އައީމަ އަޅުގަނޑުމެނަށް އިތުރު ޓޫރިސްޓުން ގެނެސް ރާއްޖޭގެ އޮކިއުޕަންސީ އިތުރުވެގެންދާނެ." ޓޫރިޒަމް މިނިސްޓްރީގެ ޑެޕިއުޓީ މިނިސްޓަރު ޙުސެއިން ޟިރާރު ވިދާޅުވިއެވެ.
މިއަހަރު ރާއްޖެއައި 1 މިލިއަން ވަނަ ފަތުރުވެރިޔާ ޗުއްޓީ ހޭދަކުރުމަށް ނިންމާފައިވަނީ މީރު އައިލެންޑް ރިސޯޓް އެންޑް ސްޕާގައެވެ. މި ފަތުރުވެރިޔާއަށް މޫވެންޕިކް ހޮޓެލްސް އެންޑް ރިސޯޓްސްއިން ރާއްޖޭގައި ހުޅުވުމަށް ތައްޔާރުވަމުން އަންނަ ކުރެދިވަރު ރިސޯޓްގައި، އަންނަ އަހަރު ޗުއްޓީ ހޭދަކޮށްލުމުގެ ފުރުސަތު ދީފައިވާއިރު، ޓްރާންސް މޯލްޑިވިއަންއިންވަނީ ރާއްޖެއައުމަށް ދެކޮޅު ޓިކެޓް ދީފައެވެ. އަދި ދިރާގުން ވަނީ ސިމްކާޑެއްވެސް ދީފައެވެ.